ကြိုးလေးတစ်ထုံးဖြစ်ချင်တယ် 

ပုဂံဟာ ပျက်နှင့်နေလည်း

ငါတို့ ဆက်ရွေ့တာပဲ

ချစ်တာကိုး။ 

တစ်နေ့ တစ်လံ 

နှစ်နေ့ နှစ်လံ 

ခေတ်ကြီးရဲ့ တောင်းဆိုချက်အရ

အပေးအယူမဆန်စွာ ငါတို့ရောက်လာတယ် 

လမ်းဆုံးအောင်လျှောက်မယ့်ခြေထောက်

ရှိတယ်မဟုတ်လား 

အတူသွားရအောင်။ 

ကြိုးပြတ်စတွေ အချင်းချင်း 

မျိုးတူရာ လိုက်ချိတ်ဆက်ကြတော့ 

ကျွန်တော်လည်း 

ကြိုးလေးတစ်ထုံးဖြစ်ချင်တာပေါ့။ 

ဒို့လမ်းက စည်းကမ်းနဲ့ကွယ်

ကျွန်တော်ဟာ 

သေဖို့အသက်မပြည့်သေးဘူးတဲ့

တောင်းပန်ပါတယ်။ 

ဒီတော်လှန်ရေးမှာ 

ကျွန်တော်ဟာ ဆင်းရဲသားပါ 

အိမ်မပိုင်တဲ့ကောင်

အလင်းရောင်မှုန်ပျပျနဲ့ကောင်လေ

နှောင်ကြိုးဖြတ်မယ့်အင်အားဟာ ချိနဲ့နဲ့ပေါ့။ 

ပိုင်ဆိုင်တာဆိုလို့ 

မရပ်တန့်မယ့်ခြေလှမ်းပဲရှိတယ်

ပြောရမှာတော့ အားနာပါတယ်

လိုက်ခဲ့မယ်

သွားနှင့်ကြ။ 

ပုဂံဟာ စောင့်နေတယ်

ပုဂံဟာ ပျက်ရင်းနဲ့စောင့်နေတယ်။ 

ကိုဟိန်း