မထင်ထားမှုများ

ထွက်လာတုန်းက အမောတကော

အမောတကောပြေးထွက်လာတဲ့ မနက်ခင်းမှာ

ကျည်သင့်ဒဏ်ရာ ဗရပွ၊

လမ်းပေါ်မှာ 

ခဏခဏ ခြေချော်ကျသွားတဲ့ မနက်ခင်းများ...၊

ကော်ဖီတွေဟာ သိပ်ခါးလွန်းတယ်။

မထင်ထားမှုများမှာ

မီးတွေသိပ်လောင်တာ ပါတယ်။

မိုးတွေသိပ်ရွာတာ ပါတယ်။

လမ်းကြောင်းလွဲမှားမှုတွေ ပါတယ်။

ကျောချင်းကပ်ပြီး တရွေ့ရွေ့ခွာတာ ပါတယ်။

အမောတကောပြေးနေသူချင်း ခြေထိုးမှုတွေ ပါတယ်။

အကြောင်းမဲ့ ဒေါသတွေ ပါတယ်။

မချေငံမှုတွေ ပါတယ်။

ကျည်ဆံတွေက ပြည်တန်တာမဟုတ်ဘူးတဲ့

မြည်သံတွေက ပြည်တန်တာပါတဲ့

မထင်ထားမှုများ.....၊

မထင်ထားမှုများမှာ

လိင်စိတ်ကို အချိုသပ်ရတာ ပါတယ်။

သူတောင်းစားဆန်မှု ပါတယ်။

အပြန်အလှန်သံသယ ပါတယ်။

ဗီလိန်ဖြစ်ရမှု ပါတယ်။

5000 တန်အသုံးချခံရမှု ပါတယ်။

တောက်တိုမည်ရ ပွေလီရှုပ်ထွေးမှုတွေ ပါတယ်။

ရှင်ကွဲနဲ့ အလွမ်းဒဏ်ရာ ပါတယ်။

မနက်ဖြန်ကို 

တစ်ယောက်တည်း ဖန်တီးတာမဟုတ်ပါဘူးတဲ့

ကျောချင်းကပ် ရင်ချင်းအပ်ပြီး 

အဆုံးအရှုံး အတုံးအရုန်းများနဲ့ ဖန်တီးပါသတဲ့

မထင်ထားမှုများ.....၊

မထင်ထားမှုများမှာ

တယောက်ကိုတယောက် မနွေးထွေးနိုင်မှု ပါတယ်။

တကိုယ်ရေအထီးကျန်မှု ပါတယ်။

အားမလိုအားမရဖြစ်မှု ပါတယ်။

အိပ်မပျော်ခြင်းများ ပါတယ်။

အဆက်အသွယ်ပြတ်တောက်မှု ပါတယ်။

ကဗျာနဲ့သဟဇာတ မဖြစ်မှု ပါတယ်။

လူတွေက သမိုင်းကိုလှီးမထုတ်နိုင်ပါဘူးတဲ့

သမိုင်းကသာ လူတွေကိုလှီးထုတ်နိုင်ပါသတဲ့

မထင်ထားမှုများ.....၊

မထင်ထားမှုများကို ကုစားဖို့

ဗုဒ္ဓရဲ့ တရားဓမ္မ ပါမလာ။

မောင်ချောနွယ်ရဲ့ သမိုင်းဖတ်စာ ပါမလာ။

အောင်ဝေးရဲ့ မြင်းကုန်းနှီးပေါ်ရွက်လွှင့် ပါမလာ။

အောင်ခင်မြင့်ရဲ့ နိုင်ငံတော်သီချင်း ပါမလာ။

ချစ်သူရဲ့ ကျန်းမာစေကြောင်း ပါမလာ။

မိတ်ဆွေတွေရဲ့ ပီယဝါစာများ ပါမလာ။

ချစ်သူနဲ့ ကွေကွင်းရသူများခင်ဗျား

မိသားစု ပျောက်ဆုံးနေသူများခင်ဗျား

မိခင် ဆုံးရှုံးသူများခင်ဗျား

နိုင်ငံတော်ကို ​​ဖေးမချင်သူများခင်ဗျား

ကျန်းမာရေးကိုဂရုစိုက်ကြပါ။

ကျည်သင့်ဒဏ်ရာ ဗရပွနဲ့ 

လမ်းပေါ်မှာ 

ခဏခဏ ခြေချော်ကျတဲ့မနက်ခင်းများ

အိမ်ပြန်စရာ အသက်ဓာတ်ကျန်တဲ့အခါ 

ပြန်စရာအိမ်ရှိနေဖို့ လိုပါတယ်။          ။

ရင်သွေး