နံလာတဲ့ကမ္ဘာ

- - - - - - - - - - -

ဒီမယ်

-ကျုပ်ကလူတိုင်းကိုအရှူံးပေးပြီးသား

-နှလုံးအေးလွန်းလို့တော့မဟုတ်ဘူး

ပြိုင်လို့မပြီးဆုံးသေးတဲ့ ပြိုင်စော်နံတွေကို

စိတ်ကကုန်ကုန်လာလို့

-ချစ်လို့ခင်လို့တော်လို့သိလို့ဘာခေါင်းစဉ်နဲ့လာလာ

-မျက်နှာသာပေးခံရတောင်

-ကျုပ်ကထွက်ပြေးတတ်တဲ့ကောင်။

-အတ္တလည်းပြိုင် ပရလည်းပြိုင်နဲ့

-ဘယ်သူမှမနိုင်နိုင်တဲ့ပွဲကြီးမှာ 

-အနိုင်ဆုတွေအတွက် 

-ကိုယ့်သိက္ခာ ကိုယ်ချနင်းနေတဲ့လူတွေကိုကြည့်ပြီး

-သံဝေဂလို့တော့မပြောချင်ဘူးဗျာ

-ကျုပ်လည်းလူပါပဲ

-ဣသာနဲ့မစ္ဆေရိယ ဘယ်ဟာကပိုအပြစ်ကြီးပါလိမ့်

-ခင်ဗျားသိလား

-ကမ္ဘာဖျက်လက်နက်တွေက ပြိုင်ရာကစတယ်ဆိုတာ။

-ကျုပ်အတွက်တော့လား..

-လွယ်အိတ်တလုံးကိုချလို့

-စားပွဲသေးသေးနဲ့ စီးကရက်တစ်ဖွာရှိုက်

-စာတစ်အုပ်အုပ်ဖတ်နေရေးနေရရင်

-ပတ်ဝန်းကျင်ကိုမေ့လို့

-မစပ်စုအားဘူးဗျို့။

-ခင်ဗျားက ပရော်ဖက်ဆာလား 

-ဝန်ကြီး ကက်ဘိနက်လား 

-ဟာဂျီလား ဘုန်းကြီးလား ဖာသာလား 

-ချင်းလားကရင်လား

-တရုတ်လားဗမာလား 

-အရေးမကြီးပါဘူး

-လာအတူသွားကြမယ်

-လက်ရည်တပြင်တည်းစားကြမယ်

-ကျုပ်နဲ့ကတသားတည်းလို့ပြောရင်

-ခင်ဗျားကကြိုက်ချင်မှတော့ကြိုက်မယ်

-မျက်ခွက်ဖြတ်ရိုက်ခံရတောင်

-ကျုပ်ကသောက်ဂရုမစိုက်ဘူး။

-ဒီမယ် 

-အာဏာရှင်ဆန့်ကျင်ရေးဘာညာ 

-ဒီမိုကရေစီဘာညာအော်ပြီး

-ကျေးဇူးရှင်သမုတ်ခံချင်လို့ ကျေးဇူးပြုနေကြတဲ့

-အာဏာရှင်လက်သစ်ကြောင်ချီးတချို့ကိုကြည့်ပြီး 

-အော်ဂလီဆန်လာလို့

-ထပ်ပြောလိုက်မယ်

-ကျုပ်ကလူတိုင်းကိုအရှူံးပေးပြီးသား

-နှလုံးအေးလွန်းလို့လို့တော့မဟုတ်ဘူး

-ခင်ဗျားတို့အူအရိုင်းကြီးနဲ့စိတ်ငရဲမကျအောင်လို့။           ။

SAOIRSE