ဘုရားသခင်အတွက် မွေးနေ့ပို့စကတ်

သို့…ကောင်းကင်ဘုံ

Dear Lord

လောကကြီးကနေ ရောက်လာတဲ့ စာတွေပုံနေလို့
ဒီစာကို ဖတ်ဖြစ်ချင်မှ ဖတ်ဖြစ်ပါလိမ့်မယ်

ဒီတစ်နှစ် မွေးနေ့ဟာ
ပျော်ဖို့ကောင်းရဲ့လား ?

ကောင်းနိုင်ပါတယ်

လူကောင်းတွေ အများကြီး
ခင်ဗျားအနားမှာ ခြံရံရင်း
ဂုဏ်ပြုကြလိမ့်မယ် မဟုတ်လား

တစ်နှစ်ပြီး တစ်နှစ်
ခင်ဗျားဟာ လက်ဆောင်တွေပေးလိုက်
ပြီးရင်...
အကြွေးတွေ သိမ်းလိုက်နဲ့။

ခင်ဗျားရဲ့ အေဂျင့်
ဆန်တာကလော့ဟာလည်း
မျက်ရည်တွေ ခမ်းခြောက်နေတယ်

သူလည်း
အလုပ်ထွက်စာတင်ချင်နေတာ ကြာပါပြီ
ခရစ္စမတ်သစ်ပင်ဟာလည်း
မီးအစစ်တွေ လောင်မြိုက်လျက် ရှိနေတယ်

ဆုတောင်းတွေကို သယ်ဆောင်ပေးတဲ့
တမန်တော်တွေဟာလည်း
လစာတိုးပေးဖို့ မျှော်လင့်နေရဲ့။

သေမင်းကလည်း
'အ' ချင်ယောင် ဆောင်နေရတယ်

သားတော်သမီးတော်တွေကလည်း
ဆုတောင်းချင်စိတ်တွေ ကုန်နေကြပြီ

ကျွန်တော်တို့ဆီကနေ
ခေါ်ဆောင်သွားတဲ့ ညီနောင်တွေကို
"အသင့်ဆီမှာ
ကောင်းစွာ အိပ်စက်ခွင့်ပေးလိုက်ပါ" ဆိုသော
ဆုတောင်းလေးတစ်ခုထက်
ဘာမှပိုမတောင်းသလို ပိုလည်းမလိုချင်တော့ပါ။

သူတို့ကား
လူ့လောကမှာတုန်းက
အရမ်းပင်ပန်းခဲ့ကြရပြီ ဖြစ်ပါသည်။

"ပျော်စရာမွေးနေ့ဖြစ်ပါစေ" ဟု
ဆုတောင်းရင်း နိဂုံးချုပ်ပါသည်။          ။

မှ
လူ့ငရဲမှ

Tommy